प्रदेश नम्बर ७ मा कांग्रेस–माओवादीबीच चुनावी एकता

बैतडी, १२ वैशाख । स्थानीय तह निर्वाचनमा प्रदेश नम्बर ७ मा कांग्रेस–माओवादीबीच चुनावी एकता गर्ने सहमति भएको छ । आजको नयाँ पत्रिकामा खबर छ– माओवादी प्रदेश नम्बर ७ का इन्चार्ज एवं स्थायी समिति सदस्य लेखराज भट्ट र कांग्रेस केन्द्रीय सदस्य एनपी साउदलगायतका नेताहरुबीच प्रदेश नम्बर ७ मा चुनावी एकता गरेर जाने सैद्धान्तिक सहमति भएको हो । प्रदेश नम्बर ७ का माओवादी प्रचार विभाग प्रमुख ओमविक्रम भाट ‘सरल’ले लामो छलफलपछि कांग्रेस र माओवादी केन्द्र चुनावी एकता गर्ने सहमतिमा पुगेको बताए । प्रदेश नम्बर ७ सुदूर पश्चिममा कुल ८८ वटा स्थानीय तह छन् । प्रदेश स्तरमा चुनावी एकताका लागि सहमति भए पनि जिल्ला तथा स्थानीय तहमा भने सर्कुलर भएको छैन । केही दिनअघि एमाले सुदूर पश्चिम समन्वय कमिटीले माओवादी केन्द्रसँग चुनावी एकता गर्ने प्रस्ताव अघि सारेको थियो ।